العودة للتصفح
بيروت
هنري زغيببيروت… بيروت
والحُبّ بْأَوّلو والحلْم بْأَوّلو
والليل الطويلْ
عَ المسافه يميلْ
ينسانا خيالَين بين القناديلْ
***
يومَا كنّا اتْنَينْ والشارع حنينْ
غامِرنا قلبَينْ وبِقلبو رنينْ
والرصيف مبلَّلْ بالشجر الحافي
وأَنا حدَّك إِسأَلْ وتقلّي: “لا تخافي”
والحُبّ بْأوّلو والحلْم بْأوّلو
والليل الطويلْ
عَ المسافه يميلْ
ينسانا خْيالَين بين القناديلْ
***
والهوى يسبَقْنا واليمام الأَليفْ
والشتي يلحَقْنا عَ طول الرصيفْ
وإنتي تغْمرينا بِلَيلِك تغْمرينا
ومدري كيف تْضَوّي كلّ الدني فينا
والحُبّ بْأوّلو والحلْم بْأوّلو
والليل الطويلْ
عَ المسافه يميلْ
ينسانا خْيالَين بين القناديلْ